بسم الله

بديـت بسـم اللـي لـه الكـل لبّـاه
رب(ن) عظيم(ن) خالق الجن من نـار
ومن بعدها باختار من قولـي أصفـاه
وانثر في شعري كل جزل(ن) ومختـار
وما كل من يطلـب مـراد(ن) بيلقـاه
وما كل من ينظم حـروف(ن) بشعّـار
بعض الشعر أردى من الـدون معنـاه
وبعض الشعر يطرب كما يطرب الطار!
وبعض الشعـر مـا لـه وزون تقفّـاه
ماهوب شعر.. إلا شعير(ن) وأمـرار!
ويا ناشدن عنـي خـذ العلـم باتـلاه
خذها جزيلة مـن جميـلات الأشعـار
يطرب بها سمعـك وذوقـك بيرضـاه
يجري بوزن(ن) مثل جـري الأنهـار
أنـا للعـز حـزت أصلـه وأعــلاه
ولد الدواسـر بالفخـر أجهـر إجهـار
حنا الدواسر أصل فخـر(ن) ومزهـاه
حنا ودينا الجـار مـن طيحـة جـدار
من نسل السنان صاحب الحكـم والجـاه
حرّ(ن) أصيل(ن) من ولد نسل الأحرار
أنـا ولـد عبدالله عزيـز(ن) مـنـاداه
شيخ(ن) تعزوى به دواسـر الأخيـار
الطيب طبعه والكـرم أصـل منشـاه
من زود طيبـه منـه الطيـب يحتـار
كسّاب صيـت(ن) والفخـر دوم ويّـاه
وفالحق صارم مثل سيـف(ن) وبتّـار
ما خاب من يزبنـه يـوم(ن) وينصـاه
يغيث من هو من عنا الوقـت منهـار
من هو طلبـه الجـود عانـه وهنّـاه
يعطي وما لـه فالعطـا مـنّ تذكـار
صحيـح مـات لكـن المجـد أبـقـاه
ما مات في التاريـخ قـرم(ن) وجبّـار
وآخـر كلامـي أدعـي الــرب يالله
صلّي وسلـم ع النبـي سِيْـد الأبـرار